Legazpi, 2024ko irailaren 27a– Legazpiko Udalak beste hobari bat onartu du, %99koa, Ondasun Higiezinen gaineko Zergan (OHZ) etxebizitza hutsen jabeentzat, baldin eta etxebizitza horiek Eusko Jaurlaritzaren Alokabide sozietate publikoak kudeatzen duen Bizigune programan inskribatzen badituzte. Neurriaren helburua da etxebizitza hutsak alokairu babestuaren merkatuan sartzea, udalerriko etxebizitza-eskaria arintzen laguntzeko. Bestalde, hutsik dauden etxebizitzen OHZren %50eko errekarguak etxebizitza horiek alokairuaren merkatura ateratzeko helburua bete ez duenez, gobernu-taldeak kentzea erabaki du.
Gaur egun, Legazpiko 39 etxebizitza daude Bizigune programan inskribatuta, eta 2025etik aurrera jabetza horiek hobari berriaren onuradun izatea espero da. Gainera, udalerrian dauden eta Bizigunen izena eman dezaketen399 etxebizitza hutsen jabeak programaren abantailak eskuratzera eta Legazpin alokairua dinamizatzen laguntzera animatu nahi ditu Udalak.
Bizigune programak etxebizitza hutsen alokairua bermatzen die jabeei, sei urterako, Eusko Jaurlaritzak bermatutako hileko errentarekin, jabetzak kontserbatu eta mantentzeko, eta obrak finantzatzeko. Gainera, Udalak, Herritarren Arreta Zerbitzuaren (HAZ) bitartez, eskaerak izapidetzea erraztuko du, eta bitartekari gisa jardungo du jabeen eta Alokabideren artean.
Neurri horrekin, udal-gobernuak udalerrian alokairuko etxebizitzen eskaintza handitzeko konpromisoa sendotzen du, eta, aldi berean, pizgarri fiskalak eta ekonomikoak dituzten jabeei laguntzen die, etxebizitza hutsen alokairua erakargarriagoa izan dadin.
Izena emateko ere, interesdunek HAZera jo dezakete
