Legazpiko Elbarrena auzo inguruan eraberritze lanak hasiko dituzte aste honetan. Zehazki, suhiltzaileen ingurutik DIA supermerkatura bitartean, ia kilometro bateko edateko ur hodia aldatuko dute. Lehenengo fasean, DIAtik Legauto ingurura jardungo dute, eta bigarrenean, zentral elektrikotik suhiltzaileetara. Aurreko astean, zurkaiztu egin dute gunea, lanei ekin ahal izateko.
Gipuzkoako Urak enpresa arduratuko da lanak egikaritzeaz, enpresa horrek Legazpiko Udalarekin daukan hitzarmenaren baitan. Izan ere, hitzarmen horren arabera, uraren kudeaketa egitearen truke, enpresa horrek udalerrian hainbat hobekuntza lan gauzatzeko konpromisoa dauka.
Lanek, printzipioz, ez dute inolako eraginik izango zirkulazioan; gehienean, bide bazterrean jardungo baitute. Alabaina, pare bat bidegurutze egin behar dituzte, eta une horietan oztopoak izango dira.
120.000 €‐ko aurrekontua izango dute lanetarako (BEZ barne), eta behin bukatuta, industrialdeko biribilgunetik DIAraino doan edateko uraren hoditeria nagusia berrituta geratuko da.
