2023an, Legazpiko Udalak klima eta energia plan bat diseinatzeko beharra nabarmendu zuen, datozen urteetan klima-aldaketari aurre egiteko hartuko den bidea sendotu ahal izateko. Horrela, Udala herrian klima-aldaketa arintzeko eta horretara egokitzeko plan bat garatzen ari da hilabete hauetan, BARRIZAR kooperatibaren eskutik.
Plan horrek 7 urteko ibilbide-orri bat finkatuko du, eta, Europar Batasunaren helburuak betetzeaz gain, honako helburu hauek izango ditu: tokiko energia-subiranotasuna bultzatzea, kanpotik datozen erregai fosilen kontsumoa murriztea eta pobrezia energetikoarekin amaitzea. Hau da, Legazpik trantsizio energetiko berde eta justu baterako bidea hartu nahi du poliki-poliki.
Plan horren garapenak bi zati ditu: diagnostiko bat eta hurrengo urteetan garatuko diren ekintzak finkatzen dituen atal bat. Ekintza horien eragina aldian-aldian ebaluatuko da.
Diagnostikoaren ondorio batzuk
Orain arte, energia-kontsumoari eta berotegi-efektuko gasen isurketari buruzko informazioarekin zerikusia duen diagnostikoa egin dugu. Diagnostiko hori joan den irailaren 26an aurkeztu zen Legazpi Klima 2030 Foroan. Besteak beste, hauek dira ondorio garrantzitsuenak:
- Mende amaierarako, tenperatura 13ºC-tik 17ºC-ra igo daiteke, eta euria % 15 murritz daiteke. Herritarrak bero-boladetatik babestu behar ditugu. Uholde-arriskua handituko da bai eta lehorteen maiztasuna ere.
- Mugikortasuna da herrian CO2 isuri gehien sortzen duen sektorea (guztizkoaren % 41,7).
- Legazpiko etxeetan gas naturalaren mendekotasun termiko handia dago.
- Udalerrian bertan sortutako energia kantitatea txikia da oraindik, sektore publikoan izan ezik, nahiz eta energia berriztagarria sortzeko potentzial handia dagoen.
Diagnostikoa osatzen lagunduko diguzu?
Diagnostikoa osatzeko, klima-aldaketak Legazpin duen eraginari buruz duzun iritzia jakin nahi dugu. Horretarako, galdera-sorta hau betetzera gonbidatzen zaitugu:
Eskerrik asko!
