Hilabete honetan, Ilar-krema prestatzera gonbidatzen zaituztegu
Hauxe da 2022ko egutegirako hautatutako gaia: gure osasunari eta ongizateari eta gure inguruneari onurak ekartzen dizkieten tokiko eta sasoiko elikagaiak.
Sasoiko elikagaiak kontsumitzen baditugu,
- Gure baserritarren ekoizpen-ereduak babesten ditugu.
- Merkaturatze iraunkorragoa sostengatzen dugu, banaketan energia gutxiago xahutzen delako.
- Lurzorua ez pobretzen laguntzen dugu. Landareen ziklo naturalak errespetatzean, laboreak txandakatzea sustatzen da eta lurzorua gutxiago pobretzen da.
Azken batean, modu naturalean lantzen direnez, nutrizio-ekarpenak mantentzen dituzte; bitaminak, mineralak eta bestelako elikagaiez ari gara. Horrez gain, testura, itxura eta zapore egokiagoa izaten dute. Sasoiko elikagaiek kalitate hobea izaten dute biltzeko garaian bilduz gero.
Zein lekale aukeratu dugu apirilerako? Ilarrak eta baba freskoak
Ilarrak eta babak barazkiak direla uste den arren, lekaleak dira, txitxirioak edo babarrunak bezalaxe.
Ilarra landare igokaria da, 2 metroko garaiera iritsi daiteke, sasitza adarkatuak eta lore zuri edo moreak ditu, eta leka bakoitzean 7-9 hazi egon ohi dira.
Espainiako Nutrizio Fundazioaren arabera, ilarren anoa batek:
- Arrautza osoa adina proteina du, nahiz eta kalitate txikiagokoa izan.
- Gramo bat koipe baino gutxiago du
- Ez du kolesterolarik
- Fosforoa edo potasioa bezalako mineralen iturria da
- C bitamina ematen du, nahiz eta horren zati bat egostean galtzen den; halaber, haurdunaldian oso garrantzitsuak diren folatoak ematen ditu.
Ilarra Ekialde Ertaineko eta Asia Erdiko elikagai bat da, eta duela milaka urtetik landatzen da.
Babak ere landare igokariak dira, 75 cm inguruko altuerakoak, eta lore zuriak dituzte, erdian orban beltz bat dutela. Leka edo zorro bakoitzean 2-9 hazi egon daitezke.
Babek nitrogenoa finkatzen dute lurzoruan, eta, beraz, lurzoruak indartzeko erabiltzen dira.
Baba freskoek proteinak eta karbono-hidratoak ematen dituzte, eta haien larruazala zuntz-iturri da; horregatik, larruazalarekin jatea komeni da. Baba freskoek lehorrek baino kaloria gutxiago dituzte. C bitamina eta folatoak ere badituzte, eta burdina eta potasio ugari. Indize gluzemiko gutxikoak direnez, gomendagarriak dira odoleko azukre-mailak zaindu nahi direnean.
Babak gizateriaren elikagai zaharrenetako bat dira, izan ere, Aro Neolitikoan (6.000 urte K.a.) jadanik landatzen zirela egiaztatu da.
Ondorengo loturan, ELIKA-Nekazaritzako Elikagaien Segurtasunerako Euskal Fundazioaren informazio-kartel bat duzue eta, bertan, hilabete honetako errezeta berezia prestatzeko azalpenak: ilar-krema.
