Datorren astelehenean, martxoak 9, Latxartegitik Juanastegira doan igogailua itxita egongo da; izan ere, ohiko mantentze eta konponketa lanak egin behar dituzte. Zehazki, 09:00etan itxiko dute, eta aurreikuspenen arabera, goiz osoa beharko dute, harik eta egin beharreko guztiak amaitu arte. Ondorioz, igogailua ez da erabilgarri egongo.
Bestalde, hastear dira bigarren igogailua egiteko obrak; alegia, aurrekoari jarraipena emateko, Juanastegitik San Ignaziora igoko dena. Eguraldi txarraren eraginez, lanak atzeratu behar izan dituzte, baina berandu baino lehen helduko diete lanei, eta aurreikuspenen arabera, bi hilabetean amaituta egongo da.
