Udalak Bertatik Bertara ekimeneko hainbat produktu
dastatzeko aukera emango die
Olazabal institutuko DBH-1eko ikasleei,
datorren ostegunean, urtarrilaren 24an,
aurrera egingo duten gosari osasuntsuan.
Bertatik Bertara ekimenarekin bat eginez,
Udalak honako produktuak eskainiko ditu:
Legazpiko Makatza baserriko ogia,
Itsasoko Haristizabal baserriko sagarrak eta
Itsasoko Urkulegi baserriko intxaurrak eta mermelada.
Horrezaz gain, esnea ere jarriko du,
baita herriko Anastasio Mujikaren eztia ere.
Olazabal institutua azpiegituraz arduratuko da
eta beste jakiak ere jarriko ditu,
besteak beste, kakaoa eta olioa.
Ekintza honen barruan, ikasleei inkesta bat pasatzen zaie,
norberaren ohiturak ezagutzeko.
Gero egunean bertan, gosaldu aurretik,
Osasun zentroko pediatrarekin solasaldi bat izango dute,
gosaltzeak eta ondo gosaltzeak duen garrantziaz jabetu daitezen.
Gosaldu ondoren, galderak eta zalantzak argitzeko tartea izango dute.
Hurrengo egunetan, etxeetara txosten bat bidaliko da,
gurasoek egoeraren berri izan dezaten
eta ohiturak aldatzeko baliagarria izan dadin.
Ez da lehen urtea
Aurtengoa ez da gosari osasuntsua egiten den lehen urtea,
Baina bai ordea, udalak gosariaren elikagai nagusiak eskaintzen duen lehen aldia.
Orain arte produktu horiek Eusko Jaurlaritzako Osasun Publikotik ekartzen ziren.
Lehen gosari osasuntsua 2014. urtean egin zen
eta orduan Haztegi ikastolako ikasleek ere parte hartu zuten.
Legazpiko “nerabeekin komunitate-esparruko esku-hartze programa”
Gosari osasuntsua ekimena
Legazpiko “nerabeekin komunitate-esparruko
esku-hartze programa”-ren barruan kokatzen da.
Osasun, Hezkuntza eta Udaleko hainbat ordezkariz osatutako lantaldea
2013ko martxoaren 6an bildu zen lehen aldiz,
batetik, bakoitzak bere esparruan zer egiten zuen jakiteko eta elkar ezagutzeko;
eta bestetik, komunitatearen ohiturak aldatzeko eta osasuna hobetzeko.
Labur esanda, programaren helburu nagusiak honakoak dira:
- Nerabeen artean osasun maila hobetzea, norberaren osasuna kudeatuz.
- Ohitura eta portaera osasungarriak sustatzea nerabeen artean.
- Toki-eremuan koordinazio maila hobetzea, nerabeen osasuna sustatzen ari diren erakundeen artean. Hau da: Hezkuntza-sistema (ikastetxeak), Udala (Gizarte Zerbitzuak eta Gazteria Zerbitzua) eta Osasun-sistema (Osasun Zentroa eta Eusko Jaurlaritzako Osasun Publikoa saila).
Hau da, programaren bidez, nerabeekin esku hartu nahi dugu,
eta haiei behar diren tresnak eskaini nahi diegu,
osasuntsu bizitzeko erabaki zuzenak har ditzaten
bai banaka bai familian.
