Azaroaren 5ean prentsaren bidez jakin zen Foru Aldundiko Mugikortasun Departamentuak udaberrian Lurraldebuseko linea berri bat martxan jartzeko asmoa zuela, Urola Garaia eta Goierri Donostiarekin lotzeko. Linea horren geltokiak Zumarraga, Beasain, Ordizia eta Tolosan egongo lirateke.
Informazio horren berri izan ondoren, hurrengo egunean, Eric Galvez Legazpiko alkateak Azahara Dominguez diputatuarekin izan zuen lehen harremana Gipuzkoako Batzar Nagusietan. Bertan, bere atsekabea adierazi zion, gai honen inguruko informaziorik jaso ez zuelako eta ezta gonbidapenik ere, sentimendu hori eskualdeko beste alkate batzuekin partekatzen duelarik, eta bere haserrea ere adierazi zion, "kasu honetan Legazpi diskriminatua izaten ari dela uste dugulako. Legazpiarrek autobus-linea horretaz baliatzeko eskubide bera dute, batez ere Renfek obren ondorioz zerbitzua murriztu duenean", adierazi du alkateak. "Diputatuen Kongresuan eskaera bat egin dugula gogorarazteko aprobetxatu nahi dut, trenen kopurua handitzeko aukera azter dezan, hobetzeko tartea dagoela uste baitugu".
Atzo, hilak 7, alkateak gutun formal bat bidali zion mugikortasuneko diputatuari bilera bat eskatzeko, Legazpik autobus-linea horren onura izan dezan. Foru diputatuak adierazi zuenez linea hori udaberrian jarriko da martxan, betiere Gipuzkoako Foru Aldundiaren 2025erako aurrekontuak onartzen badira.
Beraz, Eric Galvez alkateak Gipuzkoako Batzar Nagusietan ordezkaritza duten alderdi politiko guztiak animatu ditu aurrekontuei babesa ematera, horiek gabe ez baita autobus linea berririk egongo, ez Legazpirako, ez beste inorako ere.
