Eta Gabonetan zer? lelopean, Legazpiko Nerabeentzako Zerbitzuak hainbat ekintza antolatu ditu 11 eta 16 urte bitarteko nerabeentzat. Urtarrilaren 2an zerbitzuak 20 urte beteko ditu eta ekintza bereziak antolatuko dira orain Gabonetan, baita urtean zehar ere.
Gabon giroa sortzeko asmoz, aurreko egunetan, zenbait gazte apaingarriak sortzen aritu dira. Dena den, benetako eraldaketa abenduaren 22, 23 eta 27an burutuko da, pareta ezberdinak margotuko baitituzte. Izan ere, Gazte-txokoaren sarrerako paretetan 10.urtemugaren erreferentziak zeuden, baina horiek berritzeko proposamenak jaso ondoren, 3 egunetan berriro margotuko dituzte. Egiteko horiekin batera ez dira ospakizunak ere faltako: bazkaria izango baitute lan horietan arituko diren gazteekin.
Abenduaren 28an Urbileko Kosta Jump-era joango dira eta abenduaren 29an pizza bazkaria eta bingoa izango dute. Urtarrilaren 3tik 4ra bitartean XX.urteurren gaubela izango da. Bukatzeko, urtarrilaren 5ean, ostirala, XX.urteurrena herritarrekin ospatzeko asmoz, Nerabeentzako Zerbitzuaren eguna antolatu dute. Hori dela eta, udaletxea eta parrokiaren arteko pasabidean postu bat jarriko dute. Bertan 20 urte hauetan ateratako argazkiak erakusgai egongo dira eta ospakizunerako tarte bat hartuko dute.
Izen-ematea
Irteeran, pizza bazkarian edo/eta gaubelan parte hartzeko izena eman behar da. Izen ematea egun bakar batean egingo da: abenduak 15, ostirala, 14.30etik 18.30era, gazte-txokoan.
Bestalde, abenduaren 20 eta 21ean ohiko dinamika eskainiko da. Abenduaren 24, 30 eta 31n eta urtarrilaren 6 eta 7an ez da zerbitzurik eskainiko. Ekintza bereziak egingo diren egunetan, ez da ohiko zerbitzua eskainiko.
