16 konpainia izango dira aurten, Legazpi Musika Bandarekin batera herriko kaleak zeharkatuko dituztenak maiatzaren 2an, gaueko 11:00etatik aurrera.
Aurten danbor-konpainia berria izango dugu: HEGIALDE. Gainera, jendearen erantzun bikainari esker konpainia batzuk bigarren taldea osatu dute, honako hauek:
LA SALLE, danbor eta upelekin, iaz bezala.
LEKANAZPI elkarteak aurten danborrak ere aterako ditu, upelekin batera.
GAZTETXEAk aurten upelak ere aterako ditu, danborrekin batera.
SUKALDARIAK, 2 talde osatu dira, biak upelekin.
Guztira, beraz, 16 konpainia aterako dira bi taldetan banatuta:
- 8 danbor-konpainia, 213 kidez osatua eta
- 8 upel-konpainia, 207 kidez osatua.
Horiez gain, honako hauek ere herri-danborran hartuko dute parte:
- LEGAZPI MUSIKA BANDA, bitan banatuta ibilbidean zehar. Zuzendari-lanetan: Jesus Castillejo eta Edurne Zabalo.
- Konpainietako 15 zuzendari
- Ormazarreta zaditegiko 8 zaldun
- Ipiñarrietakoek idiekin
- Andoni Gutierrez astoarekin
- Olagizonak, gastadoreak eta kalea garbi utziko diguten 4 neska (aurten figura berria, zaldien eta astoaren gorotzak jasoko dituzte)
....denera, 520 pertsonak baino gehiagok hartuko dute parte.
Gaueko 12:00etan, konpainia guztiak plazara iritsiko dira, 15 zuzendariren gidaritzapean, eta Legazpiko ereserkiaren doinua joz, herriko bandera eta ikurrina jarriko dituzte udaletxeko balkoian.
