.: Legazpiko Udala :. Webgune ofiziala .: Ayuntamiento de Legazpi :.

Hitzaldi berri batekin datorkigu oraingoan Burdinola Elkartea, zuzendaritza talde berriak antolatuko duen lehena bide batez.

Hizlari arituko zaigun Gorka Salmeron Murgiondok, Bilboko AA EE Museoari argazki hauen donazioa egin zion joan den urtean, 207 argazki zahar inguru. Hauekin batera bere argazki batzuk erosi dituzte, "Leaxpi Industri Paisaiak" bildumakoak, eta bere zenbait argazkiren donazioa ere egin du. "Funts Berriak" erakusketa ikusgai dago Bilbon ekainera arte. Bertan 16 argazki zahar eta 3 bereak sartu dituzte. Honekin batera hitzaldi bat emango du Museoan apirilaren 8an.

Eta hitzaldi hori izango da legazpiarren aurrean aurkeztuko duena, Burdinolaren eskutik, apirilaren 15ean, asteartea, 19:00etan Kultur Etxeko areto nagusian.

Gogora ekarri nahi dugu, 2016 urtean erakusketa egin zen Legazpin bilduma honetako zenbait irudiekin (orain dela 30 urte baino gehiago Gorka Salmeron Murgiondok berreskuratu zituen PESAko argazki zaharrekin), eta "Argitara Altxor Ahaztua" liburua argitaratu zenetik 9 urte pasa dira.

Hitzaldiaren nondik norakoak:

Patricio Echeverría S.A. enpresa Legazpiko (Gipuzkoa) udalerriaren garapenaren ardatz eragilea izan da XX. mendean. Legazpiko historia, Euskadiko beste eskualde askotakoa bezala, burdinaren tradizioari lotuta dago. Eskualdean mende eta mendeetan landu da burdina. Milaka urteko tradizio honetan hiru garai daude: “Haizeolak” –aireko burdinolak–, “zeharrolak” –ur-burdinolak– eta Patricioren lantegia, 1908tik 1992an hainbat enpresatan zatitu zen arte jardunean egon zena. P.E.S.A. enpresak 12 gizonezko plantilla zuen hasieran, eta 3.500 langile izan zituen 1970eko hamarkadaren amaieran. Eskualdearen garapena “fabrikaren” mende egon da, sistema erdi feudal bat eratu zuen, eta joan den mendearen amaiera arte iraun zuen.

P.E.S.A. enpresak manufakturatutako “Bellota” altzairuek kalitate aitortua izan dute. Echeverriak, produktu bikainak eskaintzeko premisa zintzo betez, argazkilaririk onenak kontratatu zituen. Argazkien bilduma honek aukera ematen du 1918tik 1960ko hamarkadara arteko ibilbidea egiteko. Argazkilari askok erretratatu zituzten instalazioak, besteak beste, Willy Kochek, Pandok, T.A.F. aeronautikak eta Pascual Marínek, baita izen gutxiago izan arren aipatutakoen mailako lanak dituzten beste egile batzuek ere.