Legazpik mugikortasuna hobetuko du bidegorri berriaren obrekin
Laster hasiko diren bidegorri berriaren obrek Urola Garaiko bizikleta-sareko funtsezko tarte bat osatzea ahalbidetuko dute, herritarren segurtasuna eta eguneroko mugikortasuna nabarmen hobetuz. Jarduera honek herriarentzat espero zen hobekuntza bat suposatzen du, batez ere ingurune industrial batean, orain arte oinezko eta txirrindularientzako arriskuak sortzen zituen trazadura bat zegoelarik.
Proiektuak 660.177,96 euroko aurrekontua du, bost hilabeteko gauzatze-epea, eta 774 metroko bidegorri berria eraikitzea aurreikusten du. Horri esker, Legazpi eta inguruko udalerrien arteko konexio segurua indartuko da, bereziki Urretxurekin. Obren hasiera ekitaldian izan dira Gipuzkoako Foru Aldundiko Jasangarritasuneko diputatua, José Ignacio Asensio; Legazpiko alkatea, Eric Gálvez; Mugikortasuneko zinegotzia, Josu Galilea; eta Garapen Jasangarri eta Trantsizio Energetikoko zinegotzia, Óscar Valbuena.
Eric Gálvez Legazpiko alkateak jarduketaren garrantzia azpimarratu du: “oso beharrezkoa den obra da, industria-ingurune oso erabilian segurtasun-arazo bati behin betiko irtenbidea ematen diona. Udalaren, Gipuzkoako Foru Aldundiaren eta SPRILURen arteko lankidetzari esker, eta lurren lagapenari esker, arriskuak sortzen zituen trazadura zuzendu ahal izan dugu. Jarduketa honek Legazpiko bidegorri-sarea hobetzen du eta, batez ere, oinezkoen eta langileen segurtasuna indartzen du”.
Bidegorri berria Bellota-GSB urbanizazioan dagoeneko eraikita dagoen tartean oinarrituko da, eta GI-2630 errepidearen paraleloan joango da, dagoen sarearekin bat egin arte. Bi noranzkoko bizikleta-espaloia eraikiko da, galtzadarekiko goratua eta baranda longitudinal baten bidez babestua, gutxi gorabehera 2,20 metroko zabalera izango duena. Horri esker, oinezkoen eta txirrindularien arteko bizikidetza segurua bermatuko da, trafiko astuna duen ingurune batean.
Ekitaldian, Jasangarritasuneko diputatua den José Ignacio Asensiok adierazi du “proiektu hau ez dela soilik tokiko obra bat, baizik eta Urolako bizikleta-sarea osatzeko funtsezko pieza, udalerrien arteko mugikortasun seguruago eta jasangarriago baterantz aurrera egiteko”. Asensiok nabarmendu du “puntu arriskutsu bat ezabatzen ari garela, eta oinez edo bizikletaz mugitzen direnentzat benetako alternatiba eskaintzen”.
Bizikleta eta oinezko-ibilbide berriari ez ezik, proiektuak hiri-zerbitzuetan esku-hartze integrala ere barne hartzen du: saneamenduan, horniduran, euri-uren drainatzean, argiterian eta obrak eragindako beste zerbitzu batzuetan hobekuntzak egingo dira. Halaber, oinezkoentzako eta txirrindularientzako pasabideak zabaldu eta hobetuko dira, industria-eremuko autobus-geltokia egokituko da, berdegune berriak sortuko dira eta industria-itxiturak berrituko dira. Egungo bidegorriaren tartea behin betiko erabileratik kanpo geratuko da, eta ibilbide berri, askoz seguruago batek ordezkatuko du.
Bestalde, Garapen Jasangarri eta Trantsizio Energetikoko zinegotzia den Óscar Valbuenak adierazi du “jarduketa honek eragin oso positiboa du bai Urretxu-Zumarraga-Legazpi bidegorriko erabiltzaileentzat, bai industria-eremuko langileentzat, eta Legazpik mugikortasun seguru eta jasangarriagoarekin duen konpromisoa indartzen du”.
Azkenik Josu Galileak Mugikortasuneko zinegotziak nabarmendu du “bidegorri berri honek jauzi kualitatiboa dakarrela Legazpiko eguneroko mugikortasunean. Nabarmen hobetzen ditu oinez eta bizikletaz egindako joan-etorrien segurtasuna eta jarraitutasuna, eta herritarren benetako eskaera bati erantzuten dio, bereziki industria-ingurune honetan egunero mugitzen direnei”.
Proiektu honekin, Legazpik aurrera egiten du udalerri konektatuago, seguruago eta osasungarriago baten eraikuntzan, mugikortasun aktiboaren alde eginez; horrek herritarren bizi-kalitatea hobetzen du eta eskualdeko ingurunearekiko kohesioa indartzen du.
Legazpiko Udalak bereziki azpimarratu eta eskertu nahi du SPRILURen inplikazioa, eta baita Gipuzkoako Foru Aldundiarena ere, proiektu hau errealitate bihurtzeko ezinbestekoa izan baitira. Beharrezko lurren lagapenak eta SPRILURen, Gipuzkoako Foru Aldundiaren eta Udalaren arteko lan koordinatuak aukera eman dute egoera konplexu bat desblokeatzeko eta urteetan segurtasun-arazoak sortu dituen trazadura bati behin betiko irtenbidea emateko. Lankidetza instituzional hori funtsezkoa izan da udalerriarentzat estrategikoa den ingurune batean mugikortasuna eta segurtasuna hobetzeko.
