Legazpin, euskaraz gehiago eta hobeto hitz egiteko aukera ematen du Mintzalagun egitasmoak
Gaur aurkeztu den egitasmoak helburu oso sinplea bezain garrantzitsua du: Legazpin euskaraz gehiago hitz egiteko aukerak sortzea eta herritarren artean euskararen erabilera sustatzea. Horretarako, aurten ere Mintzalagun egitasmoa jarriko dugu martxan.
Zer da Mintzalaguna?
Mintzalaguna euskaraz hitz egiteko ohitura eta konfiantza irabazteko egitasmoa da.
Askotan, euskaraz jakinagatik, ingurua falta izaten zaigu euskaraz hitz egiteko, edo bizitza publikoa euskaraz egiten hasteko konfiantza irabazi behar izaten dugu. Mintzalaguna programak, horixe du helburu: euskaraz hitz egiteko lagunartea, eta euskaraz hobeto egiteko konfiantza izateko babesgunea eskaintzea.
Mintzalagunean euskaraz hitz egiteko gogoa duten pertsonak talde txikietan elkartzen dira, normalean astean behin, modu lasai eta informalean, eta euskaraz aritzen dira.
Ez da klase bat. Mintzalaguna ez da gramatika-eskola bat, eta ez dago azterketarik edo ebaluaziorik. Helburua ez da akatsik ez egitea; helburua euskaraz hitz egitea da.
Talde bakoitzean euskara erabiltzen laguntzen duten pertsonak eta euskara praktikatu nahi dutenak elkartzen dira. Horrela, guztien artean, euskaraz aritzeko espazio eroso eta atsegin bat sortzen da. Kafetegi batean elkartzea izan daiteke, paseatzera joatea, herrian buelta bat ematea, kirolaz, musikaz, lanaz, aisialdiaz edo eguneroko kontuez hitz egitea… Azken batean, euskaraz bizitzeko eta euskaraz hitz egiteko beste aukera bat da.
Nori zuzenduta dago?
Mintzalaguna euskaraz hitz egin nahi duen edonorentzat da. Baina aurten, bereziki, gazteak animatu nahi ditugu parte hartzera. Badakigu gazte askok euskara ikasi dutela edo ikasten ari direla. Badakite euskaraz, baina askotan ez dute behar adina aukera aurkitzen hizkuntza erabiltzeko. Eta hizkuntza bat ikasteko edo hobetzeko, ezinbestekoa da erabiltzea. Horregatik, euskara hobetu nahi duten gazte guztiei dei egin nahi diegu.
Zergatik parte hartu?
Mintzalagunean parte hartzeko arrazoi asko daude.
Lehenengoa eta garrantzitsuena: euskaraz hitz egiteko aukera ematen duelako.
Baina horrez gain, Mintzalaguna euskaraz bizi nahi duen pertsonarentzat oso baliagarria izan daiteke:
- Hitz egiteko lotsa galtzeko;
- Euskarazko elkarrizketetan konfiantza hartzeko;
- Hiztegia aberasteko;
- Ahozkotasuna eta jariotasuna hobetzeko;
- Ikasitakoa benetako egoeretan erabiltzeko;
- Euskara eguneroko bizitzarekin lotzeko;
- Euskaraz aritzeko lagunak egitea.
- Eta, batez ere, euskaraz hitz egitea gero eta naturalago bihurtzeko.
Beraz, Mintzalagun izan nahi baduzu, deitu Euskaltegira 843 74 00 90 telefonora eta eman izena. Horrela, gaur egun martxan dagoen talderen batera sartuko zaitugu. Aurrera begira, Euskararen Egunaren bueltan, Mintzalagunaren saio irekia ere egingo dugu, proiektua ezagutu eta euskara Legazpin euskara zabaltzeko.
Bukatzeko, ideia bat azpimarratu nahi dugu: Euskara ikastea ez da ikasgelan bakarrik egiten. Euskara erabiliz ere ikasten da. Mintzalaguna dakizuna praktikan jartzeko aukera da.
