Korostiko Igoera Bertikala berezia apirilaren 25ean Legazpin, Jokin Uribetxeberriari omenaldiarekin

Apirilaren 25ean egingo da Korostiko Igoera Bertikala Legazpin, Legazpiko Gazte Asanbladak antolatuta. Aurrez jardueraren berri eman bada ere, aurtengo edizioak izaera berezia hartuko duela jakinarazi nahi da, I. Gazte Festen programaren barruan kokatzeaz gain, Jokin Uribetxeberriari omenaldi xume baina hunkigarria ere egingo baitzaio.

Gainera, 8 urteren ondoren igoera hau berriz antolatzea lortu da, eta horrek ere berezitasun handiagoa ematen dio aurtengo hitzorduari.

Ekitaldia Euskal Herria plazan hasiko da, eta parte-hartzaileek Korosti mendira igoko dute ibilbidea. Guztira, 3 kilometroko luzera eta 530 metroko desnibel positiboa izango ditu.

Jardunaldiari goizeko 8:30ean emango zaio hasiera, dortsalen banaketarekin Legazpiko Udaletxe parean. Irteerak 9:15etik aurrera egingo dira, minutuero. Parte-hartzea banaka edo bikoteka egin ahal izango da (mistoa edo sexu berekoa), eta lehen parte-hartzaileen iritsiera 9:45 eta 10:00 artean aurreikusten da. Goizean goiz, jarduerari hasiera emateko, parte-hartzaileen artean talde-argazkia ere aterako da.

Antolatzaileek azpimarratu dute jarduera ez dela ohiko lehiaketa bat izango; helburua parte-hartzea, ahalegina eta giro ona sustatzea da. Hori dela eta, sariak zozketa bidez banatuko dira, eta ez sailkapenaren arabera.

Igoeraren ostean, Korostin anoa-postua egongo da, eta ondoren parte-hartzaileak herrira jaitsiko dira. Sari banaketa 12:30ean egingo da, eta une horretan bertan egingo zaio omenaldia Jokin Uribetxeberriari. Lagunek, taldekideek eta familiako kideek hitza hartuko dute, eta topa batekin eta oroitzapen hunkigarri batekin emango zaio amaiera ekitaldiari.

Ekimen honen bidez, antolatzaileek herritarren artean ohitura osasuntsuak eta mendiko kirolak sustatzeaz gain, komunitate giroa indartu nahi dute. Aurtengo edizio berezi honek, gainera, kirolak eta komunitateak batzen duten balioa azpimarratu nahi du, Jokin Uribetxeberriaren oroimena presente izanik.

Legazpiko Gazte Asanbladak eta Udalak herritarrak animatu nahi dituzte bai Korostiko Igoeran parte hartzera, bai Jokin Uribetxeberriari egingo zaion omenaldira hurbiltzera; elkarrekin une berezi bat partekatzeko eta bere oroimena gertutik bizitzeko aukera izango baita.

Informazio gehiago:

• Beñat Iturbe — 610 962 491
• Unax Urtegi — 688 853 145
• Helbide elektronikoa: This email address is being protected from spambots. You need JavaScript enabled to view it.