Irisgarritasun-tresnak
Skip to main content

"Iraganera bidaia. Objektuak gizartearen isla" erakusketa ostiraletik aurrera garai bateko Elorza Papeleran

2025/09/18
"Iraganera bidaia. Objektuak gizartearen isla" erakusketa ostiraletik aurrera garai bateko Elorza Papeleran
LENBUR Fundazioak Fabrika museoan 2025ean garatuko dituen jardueren artean, "Iraganera bidaia. Objektuak gizartearen isla" izeneko erakusketa antolatuko du. Erakusketa ostiralean irailaren 19an arratsaldeko 18.30ean inauguratuko da, garai bateko Elorza Papeleran. 
 
Erakusketa ondorengo egun eta ordutegian egongo da ikusgai:
  • Irailak 19, 20, 21, 26, 27 eta 28
  • Urriak 3, 4 eta 5
 
Ordutegia: 
  • Ostirala (17.00-19.00)
  • Larunbata (11.30-13.30 / 17.00- 19.00)
  • Igandea (11.30-13.30)
 
Erakusketa
Industria-iraultzak aldaketak ekarri zituen eguneroko objektuak ekoizteko moduan. Industriaren mekanizazioari esker, eguneroko objektuak eskala handian ekoiztu ziren, eta  horrek kostuak murriztu eta produktuak irisgarriagoak bihurtu zituen. Produktu berriei  marka jarri zitzaien gainerakoetatik bereizteko, eta objektu berriak pixkanaka sartu ziren etxeetan: garbigailua, hozkailua, telebista, telefono finkoa eta abar. Ezinbestekoak bihurtu ziren. Markek, nolabaiteko iraultza bisual bat eragin zuten, eta modu honetan, publizitateak artea demokratizatzen lagundu zuen. Ordura arte, herritarrek ez ziren museoetara joaten, leku erdi pribatuak baitziren, sakralizatuak, itxiak... eta, beraz, artea gutxiengo batentzat  gordeta zegoen. Markei esker, herrietako kaleak eta dendak errotulu koloretsuz bete ziren  eta artistak kartelak margotzen hasi ziren.  60ko hamarkadan kontsumoa irauli zuen material berri bat agertu zen, plastikoa,  edozertarako erabiltzen hasi zena, arropa bera ere plastikozkoa izaten hasi zen!  Galtzerdiak nylonezkoak izaten ziren, kamisetak poliesterezkoak eta prakak tergalezkoak. Altzariak formikakoak egiten hasi ziren, 60ko hamarkadako sukalde guztietan instalatu zen material garbi eta erresistentea. Plater hautsezinak ere sortu ziren,  hala nola Duralex edo Arcopal, eta Tupperwareak izar bihurtu ziren. 
 
Horrenbestez, landuko diren gaiek Garapen Iraunkorreko Helburuekin lotura zuzena izango dute. Adibidez, plastikoan oinarria duten produktuak aztertuko dira: formikaren erabilera, oihalgintzan tergal edo naylona, eta abar. Erakusketaren helburu  nagusienetariko bat, genero-berdintasuna sustatzea izango da, horregatik emakumea izango da protagonista nagusia.