Udalerriko aterpe klimatikoen sarea diseinatzen: KLIMA TOUR azoka ekainaren 5ean eta LEGAZPI KLIMA 2030 FOROaren saioa ekainaren 9an
KLIMA TOUR - Ekainak 5, ostirala - Plazaolan (Elizaren parean) 10:30etik 12:00ak arte
Urola Garaiako Eskolako Agenda 2030 programan parte hartu duten zazpi ikastetxeek azken bi ikasturteetan klima aldaketaren eta horren ondorioen inguruan egindako lanketaren emaitzak aurkeztuko dituzte KLIMA TOUR azokan. Ekimenaren helburua da herritarren artean klima aldaketaren inguruko kontzientziazioa handitzea eta, bereziki, aterpe klimatikoen garrantzia ezagutaraztea.
Azokak herritarren parte-hartzea sustatzeko hainbat elementu izango ditu. Horien artean, “itzalkideak” nabarmendu behar dira: aterki zuriak eramango dituzten laguntzaileak, herritarrak azokara hurbildu eta informazioa jasotzera gonbidatuko dituztenak. Gainera, galdetegi labur bat erantzuten dutenek sari bat jasotzeko aukera izango dute bero boladen aurrean ondo hidratatu ahal izateko.
Ikasleen lanekin batera, bisitariek “Klima aldaketa eta egokitzapena” erakusketa ere ikusi ahal izango dute, klima larrialdiaren aurrean hartu beharreko neurriak eta egokitzapen estrategiak ezagutzeko.
KLIMA TOUR azokak aukera paregabea eskaintzen du herritarrek gazteen ikuspegia ezagutzeko eta klima aldaketaren aurrean guztion artean egin dezakegunari buruz hausnartzeko.
Animatu eta parte hartu! Etorri gure herrietako gazteenek klima aldaketari aurre egiteko eta horretara egokitzen laguntzeko egindako lana ezagutzera.
LEGAZPI KLIMA FOROA - Ekainak 9, asteartea - Gizarte zentroan 18:00etatik 19:30era
Datorren asteartean, ekainaren 9an, 18:00etan, Legazpiko Gizarte Zentroan, Legazpi Klima 2030 Foroaren saio berri bat egingo da, aterpe klimatikoen ezarpenari buruzkoa.
Azken asteetako bero-boladak agerian utzi du muturreko tenperaturetatik babesteko gune seguruak izatea premiazkoa dela. Horregatik, Legazpiko Udalak herritar guztiak gonbidatzen ditu aterpe klimatikoei buruzko bigarren topaketan parte hartzera. Proiektu hau eskualdearekin koordinatuta garatzen da, eta ikastetxeetako ikasleen inplikazioa du, 2030 Agendaren eskola-foroaren bidez.
Saioaren helburuak
Aurreko bileran, aterpe klimatiko bihurtzeko potentziala zuten udalerriko puntuak identifikatu ziren. Oraingoan, aterpe horiek martxan jartzeko funtsezko gaiak jorratu behar dira:
- Beharrezko baliabideak: zer ekipamendu eta zerbitzu eskaini behar dituen aterpe bakoitzak (ura, itzala, klimatizazioa, irisgarritasuna...).
- Herritarrentzako komunikazioa: nola jakinarazi herritarrei gune horiek daudela eta alerta meteorologikoko egoeretan irekitzeko protokoloak daudela.
- Sarearen aktibazioa: herritarrei abisatzeko irizpideak eta kanalak, babeslekuak martxan jartzen direnean.
Parte hartzeko aukera bat
Sare honen arrakasta Legazpin bizi direnen benetako beharrei erantzutearen araberakoa da. Horregatik, funtsezkoa da herritarren ekarpena. Saioa klima-aldaketaren aurrean prestatuago dagoen udalerri baten alde lan egin nahi duen edonori zuzenduta dago.
