"Beste begirada bat" Legazpiko Gizarte Zentrora iritsiko da
Asteartean, martxoak 10, "Beste begirada bat/Una visión diferente" saioa hartuko du Legazpik. Erretinaren ikusmen baxuari eta herentziazko distrofiei buruzko sentsibilizazio-jarduera da, Retina Euskadi Begisare elkarteak eta Nagusilanek bultzatua, Legazpiko Udalaren laguntzarekin.
Hitzordua 18:15ean izango da, Gizarte Zentroan, eta herritar guztiei zuzenduta dago, bereziki adinekoei, senideei eta ikusmen txikia duten pertsonen errealitatea gertutik ezagutu nahi dutenei.
Saioan zehar patologia horiei buruzko informazioa emango da, testigantzak partekatuko dira lehen pertsonan, eta eskuragarri dauden baliabideak eta laguntzak aurkeztuko dira, eragindako pertsonen autonomia eta parte-hartze soziala hobetzeko. Errealitate birtualeko betaurrekoak probatzeko aukera izango dugu, kaltetutako pertsonen egoera hobeto ulertzeko.
Horrelako ekimenekin, Legazpiko Udalak berretsi egiten du udalerriko pertsona guztien bizi-kalitatea hobetzeko eta gizarteratzeko konpromisoa.
